فالنتين هالسنة

 

بقلم : عابر سبيل

يا مدام.. 
يا شريكة هالعمر.. 
صار لنا ربع قرن.. 
وعم نقطف صبر.. 
من يوم اللي صرنا لبعض.. وبنينا  هالأحلام.. 
وهلق صرنا عم نبني.. كوليستورول ودهون مع الأيام.. 
بس وحياتك.. بعدو خصرك عندي ألف باء الجمال.. 
ولو إنو ال -أ- انحنت شوي.. والباء زاد وزنا ع الشمال.. 
يا مرتي.. 
ب فالنتين هالسنة بلا هدايا.. 
انت الهدية.. 
وانت الضو ب زوايا المرايا.. 
بلا ورد وبلا عطر.. 
الحب مش مظاهر.. 
الحب إنو نضل سوا.. 
والقلب بعدو عامر.. 
بتعرفي؟!.. 
بعدك لما بتضحكي.. 
بتزغري عشر سنين..
وبعدو عطرك أطيب من مي الزهر.. والياسمين.. 
انت الحلا كلو.. 
ورفيقة هالسنين.. 
بلا كيك وبلا شمع.. 
وبلا كتر كلام.. 
الحب ب قلبنا ظاهر.. 
وما بدو علام.. 
تعي ننسى التعب.. ونضحك عالزمان.. 
قومي نصلح الماضي.. 
نلم الشمل... 
ونتدفا تحت الحرام...