يا زياد

 

يا زياد....
يا مَلَك الساحَه اللِبنانيّه ع بياض
ويا زَمان الطائِفيّه والأوغاد
كان المفروض إنتو تْموتوا مِش زِياد
 مِش زِياد
يا كاتِب أحلى الأغاني كِلماتَك كِلا مَعاني
ألحانَك مِن كوكَب تاني والكوبليه بَعدو بيِنعاد
 يا زِياد
للفَن بفَنَّك دَوَختو لِرغيف السِخن ضَحَكْتو
بالشَمع الأحمَر خَتَمْتو كَسَرِت كِل الأبعاد 
 يا زِياد
يا حبيب الملايين مِشيو خَلفَك لِ مساكين  
وعلّيا لِعيونا حِلوين لوَّنو دموعا السَواد
 يا زِياد
مِنَّك الحُب تعَلَمْت بلا ولا شي دَندَنت
وقِف الشِعر دقيقة صَمت ولْمَزِح أعلَن لِحداد
يا زِياد
صارت تِفهَم هاك البِنت وعَم تسألني كيفَك إنت
يا ضيعانَك مَلا إنت بألف سِني ما بتِنعاد 
 يا زِياد
ما عَمنَعرِف شو بَدّو وما بَدنا نِفهَم قدّو
أغلاطو ما بيِنعَدو وعَم بِتاجِر بالعِباد
 يا زِياد
لو بِتشوف مَربى الدلال رَقص ومِحن وإبتذال
مهرَجان وإحتِفال وشَعب غَزّه عَم يِنباد
 يا زِياد
جنوبَك واقِف بولادو والمعَتَّر هوِي ذاتو
ألوف الشهدا لِماتو وبَعدو زَكَريا  قَواد
 يا زِياد
قولَك رَح توعى ل شعوب أو بَس علينا مَكتوب
نُصمُد ونموت بالجَنوب  والحَكَم هوّي الجلاد
 يا زِياد
الحرب الأهلِيّه عِشناها قِلو كِس إختَك بلاها
مِن كِتِر ما تذَكَرناها الهيئَه إنّو رَح تِنعاد
 يا زِياد
والله أنا مِش كافِر مَقبور بِبَيتي وناطِر 
قالو عنّي شاعِر شاطِر  لا قَل الحَكي ولا زاد
   يا زِياد
لو فيّي لعَندَك روح إرجع آخد مِنَّك روح
أو إتبَرَعلَك بالروح وتِرجَع تَخَفِف أحْقاد
 يا زِياد
يا نيال السَما فيك ويِمكِن حَتى ما تكَفّيك
صِرِت حِب التِلفريك تَقَرِّب مِنَّك بِلْكاد
 يا زِياد
الحُكومِه طِلعِت بِتحِبَك بنَفس الخَندَق نامِت حَدك
طالبنا بشارِع بإسمَك عِملوا بإسمَك أوتوستراد
 يا زِياد
معقول بتِترُك فيروز هيكي بي شَهِر تَموز
مَقهورَه عليك يا بو الزوز كان حِلما تشوف الأحفاد
 يا زِياد
بمأتَمَك كان في شراشيح وشيخ الكافرين الشَبيح
شو ذَرَفو دموع تماسيح بَس يا ريتَك كِنِت غاد  
 يا زِياد
عَهد علينا يا رَفيق نِمشي ونكَفّي الطَريق
إلا ما هَل الشَعب يفيق أو حَكياتي حَكي ولاد
 يا زِياد
يا أيقونِة الابداع لَو وَقتي يا معَلِّم ساع
بتصير تبَطِّل تِنذاع وأنا وعَم عِد الأمجاد
 يا زِياد
يا ملك الساحة اللبنانية عا بياض.

كلمات : سعيد ملاعب
ألحان : نجاد الأسعد
فيديوغرافي : نجاد الاسعد